نصائح طبية للسيدات أثناء فترة الحمل

قال الدكتور طاهر عبدالقاهر أخصائي النساء والولادة أن السيدة الحامل لازم تعرف أن الحمل ده شئ فسيولوجي وليس مرض يعني حضرتك لما يكون عندك دوخة أو مغص أو قئ أو وجع في ضهرك أو حرقان في المعدة، دول كلهم أعراض الحمل وفي أغلب الأحوال لا تحتاج الي علاج إلا لو زادت عن الحد الطبيعي وده بيحدده الطبيب المعالج.

فلا تطلبي من الطبيب انه يكتبلك لكل عرض علاج اكتبلي حاجة للمعدة اكتبلي حاجة للقئ اكتبلي للمغص، مش قادرة استحمل وجع ضهري اكتبلي حاجة.

وأضاف أخصائي النساء والولادة بالنسبة لعدد زيارات المتابعة أثناء الحمل لو الحمل بتاعك حمل طبيعي يبقي طبقا للطب والعلم المتابعات بتكون مرة كل شهر من الشهر الأول حتي الشهر السابع ومرتين في الشهر في الشهر التامن ومرة كل أسبوع في الشهر التاسع

يعني لو حسبتي متابعة الحمل كله هيكون عبارة عن ٦ كشوفات و٦ إعادات تقريبا وأنا شخصيا بعمل كده مع السيدات المتابعين معايا تكشف النهاردة مثلا واعادة الكشف بعد شهر ما لم يستجد أي طوارئ.

ويشير الدكتور طاهر عبدالقادر بعض الحالات الحرجة تتطلب عدد متابعات أكتر من اللي قولنا عليهم وده بيحدده الطبيب المعالج زي حالات السكر أو الضغط أو تسمم حمل أو حامل في تؤام أو مشيمة متقدمة.

وبالنسبة الادوية الروتينية للحوامل في حمل طبيعي أول ٣ شهور من الحمل في الغالب لا تحتاجي الا حمض الفوليك وابتداءا من الشهر الرابع سوف تحتاجي إلى أقراص الحديد والكالسيوم مع الاهتمام بالتغذية السليمة و لا تطلبي من الطبيب أنه يكتبلك فيتامينات أكتر واوميجا ثري وغيرهم،، حتى حقن تحفيز الرئة مش لازم لازم تاخديها لأنها مش بتتاخد في كل الحالات ودا شئ بيحدده الطبيب

وبالنسبة للتحاليل أثناء الحمل مش كل زيارة تطلبي انه الطبيب يعملك تحاليل، احنا عندنا تحاليل اساسية زي فصيلة الدم و ال RH وصورة دم كاملة وتحليل سكر الدم وتحليل بول ودول كلهم ليهم مواعيد بيحددها الطبيب المعالج ومش معنى انه حضرتك سقطتي مرة يبقي لازم الطبيب يعملك تحاليل زي التحاليل اللي بتسموها تجلط في الدم.

وبالنسبة للأشعة الرباعية الأبعاد أثناء الحمل عمل هذه الأشعة ليس روتينيا أثناء الحمل ومش لازم لازم تعمليها الا لو الطبيب المعالج طلبها.  

وبالنسبة للولادة لو حضرتك واثقة أنه الطبيب اللي بتابعي عنده طبيب أمين ومستواه الطبي كويس يبقي خليكي ماشية معاه في القرار اللي هياخده في الولادة سواء طبيعي أو قيصري.

واوعي في ولادتك سواء طبيعي أو قيصري تدوري علي أرخص سعر لأنه الرخيص غالي وكله هيكون علي حساب صحتك وسلامتك أثناء الولادة، فكري أنه اهم حاجة سلامتك انتي وطفلك، فيه ستات كتير بتصرف الآلاف في أسبوع المولود وييجوا عند حساب الولادة يفاصلوا ويستنصحوا وفي نفس الوقت حقك ترفضى الولادة عند طبيب مغالي جدا جدا في سعره عن الشائع في المنطقة اللي انتي عايشة فيها.

أنا ذكرت كل اللي فات عشان لقيت سيدات كتير بتصمم يكتبلها أدوية كتير ملهاش لازمة أو يطلبوا تحاليل ملهاش لازمة أو عاوزين كل يوم ييجوا يكشفوا عشان قلقانين علي الحمل وبيزعلوا لما اقولهم الاعادة بعد شهر.